今個中國新年前幾日，街上都仲係靜英英嘅時候，我同太座就去咗旺角嗰度行咗一轉睇睇個市況。行到去其中一間唱片店前面聽到佢哋播緊一位女歌手最新嘅唱碟，我一聽就覺得嗰把聲又熟悉但係又陌生嘅感覺。熟悉嘅原因因爲我一聽就聽得出呢位女歌手係邊個，陌生嘅原因就係佢把聲變得比較成熟開始有女人嘅韻味。

之前我買佢啲碟係因為佢啲碟嘅價錢平人一半（買買下都買咗十幾隻），音效又比較突出人聲都可以叫做嬌甜，當然有部分師兄覺得呢啲係味精碟，聽得多會聽壞耳仔。自從佢來咗香港發展之後，我覺得反而氣勢轉弱，可能係噉隔咗幾年之後似乎好似銷聲匿跡，再出道就出咗呢隻新碟其實已經係大陸製作和錄音。

香港嗰班音樂人可能捉到鹿唔識脫角，蛇都俾佢哋玩死，反而佢上返去同大陸音樂人合作就似乎如魚得水再次發揮佢唱歌嘅長處。講真我響間唱片店嗰度聽咗一兩首歌我就即刻科水200幾文買咗落嚟，以前嗰啲碟60蚊我覺得係超值，而家我甘心畀200幾文係覺得值亦都係對佢嘅肯定。


喇叭出聲再用mic收錄。

警告! 警告! 警告!
重要嘅事要講三次。

本人經過長時間訓練兼且對自己器材相當瞭解（都有冒險嘅成分），先夠膽將部9W嘅晶體管機推到去極限，奉勸初哥切勿模仿以免導致機毀喇叭亡。

膽機因為用牛輸出有軟性削波嘅特性，就算你開始聽到有明顯失真嘅時候都來得切將音量收細，但係如果係晶體管機可能災難已經發生，特別係啲細瓦數嘅晶體管機當開到個音量比較大嘅時候。

言歸正傳:
第一隻音樂就係「大浪淘沙 - 精英獨奏」英國初版裏面嘅打鼓音樂 - 夜深沉。當時的音響雜誌有介紹到呢隻音樂在錄製嗰陣時遇到嘅問題，當時錄製現場濕度偏高鼓皮比較鬆軟，所以響佢哋正式錄音嗰陣時好似係用電暖爐或者火爐稍為收返乾個鼓皮。西人就出咗一隻打斷鼓棍嘅碟，因為碟面有條斷嘅鼓棍所以好多發燒友索性叫呢隻碟做打斷鼓棍，當然唔係話佢真係打斷咗條鼓棍。但係根據音響雜誌嘅訪問當時錄音嘅時候真係打斷咗條鼓棍，錄音嗰陣時唔會只錄一次係錄咗好幾次，其中一次打斷咗條鼓棍，所以呢隻樂曲係名副其實嘅打斷鼓棍。可惜係網上搵唔返呢篇訪問。

聽打鼓嘅音樂當然每下落棍都應該清清楚楚，鼓殼邊、鼓皮邊同鼓中間質感完全唔一樣必須清晰可聞和有比較大動態才顯得嗰個氣勢。呢個錄音係呢部9W晶體管機嘅搏老命之作，睇下得唔得。



喇叭出聲再用mic收錄。

中國人相對比較含蓄，響歌詞裏面性愛呢家嘢梗係用代名詞啦，唔似得啲外國鬼會相當直接就直情講「making love」。本地填詞人最鍾意用跳舞去代表做愛，不過呢隻歌就比較大膽兼露骨，特別係男女對叫個一下（一個高音、一個低音）會令人有好多遐想，又好似男嘅和聲唔知係咪專登講歪啲音就變成（插、插、插...）。



喇叭出聲再用mic收錄。

「西方日報」星期三嗰個樂壇專欄都有講過校長呢隻碟錄音係有問題，當時錄音電平都係相對偏低兼且成隻碟嘅音樂低音都係比較突出。以前套系統無論DAC解碼器嘅級數及擴音機嘅低音控制力冇咁好嘅時候聽起嚟整個音樂都係鬆、鬱、朦，所以聽咗幾次就再提唔起勁去聽。自從改善咗低音之後再聽返呢隻碟感覺完全不一樣，絕對會令到身體會不自主地隨音樂而跳動起來。



喇叭出聲再用mic收錄。