繼續舞照跳，歌照播。



DIY信號線接響DAC同擴音機之間，魔改擴音機在推喇叭之後再用咪收錄。





最後修改時間: 2025-05-17 22:14:43

話咗砌部無負回輸放大器講都講咗兩三年，暫時都仲係淪落響紙張嘅階段（最主要我冇乜金工嘅器材可以開窿得牙）。之前模擬測試都係用正弦波，頻率係可以去到1Mhz當然輸出訊號會有一啲相位差。近期嘗試用方波睇睇個情況如何，似乎響上沿同下沿都有少少鈴震嘅現場，加上無負回輸放大器響低頻控制力係相對弱一啲，咁就漸漸打擊咗我繼續落去嘅信心。

反觀有負回輸嘅電流放大電路，無論正弦波同方波嘅放大能力都相當出眾。剛剛模擬咗一個兩倍放大嘅電流放大器，輸入8V 100KHz方波輸出得出一個16V接近完美嘅方波。咁就令到我可能轉變思路，先砌咗呢個電壓放大加電流放大嘅功率放大器。





最後修改時間: 2025-05-15 17:04:46

呢位著名歌手年紀都有返咁上下，不過近期非常活躍響內地啲音樂節目，不過氣量已經不服當年勇，突然間想聽聽佢全盛時期嗰啲歌，咁不如即刻播返幾隻止下癮。



DIY信號線接響DAC同擴音機之間，魔改擴音機在推喇叭之後再用咪收錄。





最後修改時間: 2025-05-10 00:28:29

5月1號JBL嘅遊學團有倖成為當中一份子，第一場就係15a師兄DIY喇叭陣列。對我嚟講DIY任何產品都冇喇叭咁困難，17呎長horn身將佢卷成兩三個圈，真係講就容易做就相當難。我都成日話砌件嘢出嚟要出到聲唔係太難，但係要出到合符要求嘅聲就相當艱難。



如果睇返張相你就發覺嗰個喇叭嘅大細基本上佔咗個空間超過咗三分之二，加上每邊有四個大低音作推挽輸出，樓頂兩旁再加上兩支低音炮再加上幾路電子分音。其實一睇咁嘅格局就好擔心佢嘅低音可能會撞到亂曬籠，但一出聲基本上佢嘅樂器分離度同分析力相當唔錯，聽一啲大合唱嘅歌如果你合埋對眼可能以為自己置身於一個音樂廳四週嘅牆壁彷彿好似不存在一樣，不過如果你係嗰啲要勁到撲穿頭或者揼心口嗰類低音，似乎就唔係你杯茶因為呢套機係攞嚟聽音樂嘅。


至於葉sir嗰度先賣過關子，每個人都可能會有根深蒂固嘅概念或者思想，即係你聽緊十零廿萬嘅CD機遇著一個聽差唔多價錢嘅LP師兄，對方第一句就會話：「CD機有數碼聲唔係我杯茶」。奇怪就係當聽CD呢位師兄遇到聽串流或者CAS嘅另一位師兄佢都係講返同一段說話：「串流啲數碼聲咁大點聽得㗎。」。故事當然未完，對於我呢啲聽開file或其他師兄聽開串流，一聽到有人用藍牙聽歌自然暟之以鼻，無他因為藍牙嘅標準基本上同串流和CD機簡直唔係同一個檔次。講咁多廢話其實正正就想講葉sir開聲嗰部機就係一部香港人設計嘅藍牙串流機，呢排啲音樂書都有介紹其實我都好好奇，藍牙啲聲可以靚成點樣？估唔到咁快就有機會聽當然第一個舉手報名。

葉sir係用手機響Tidal嗰度用手機揀歌嚟播放當然相當方便（播放自己手上嘅wav file都得)，開頭播咗幾隻音樂和歌曲，因為我都冇呢啲歌所以冇可比較嘅內容，只可以話有唔錯嘅表現。後來我點首鄧麗君嘅歌但係因為版本不一樣亦都唔可以作直接嘅比較，嚟到呢度劇情往往就會反轉，當葉sir佢哋播一隻男低音歌嘅時候，低音可以去到嘅程度你唔會覺得佢不足，不但足夠男聲嘅厚度亦都足以難忘，低音嘅勁度同狠度都聽得相當過癮，呢一刻已經完全忘記咗乜嘢制式嘅限制。




其實好多發燒友忘記咗機械嘅黃金期已經過咗好耐...好耐...，要再進步簡直難如登天，相反響電子或者軟件呢邊嘅進步真係一日千里，你冇可能唔會相信檔案播放系統最終會勝過傳統機械類比系統。
呢隻碟近期會出現響音響雜誌播放系列裏面或者大家互相交流嘅時候必播嘅歌曲，咁我都趁下熱鬧錄製咗其中嘅一首。


DIY信號線接響DAC同擴音機之間，魔改擴音機在推喇叭之後再用咪收錄。





最後修改時間: 2025-05-03 17:01:33

自從屋企加咗對鉛刀之後，整個聲音都有明顯嘅改變，真係牽一髮而動全身。因應呢個改變整個吸音嘅佈局都需要作微調去配合，而家稍為覺得比較滿意。

黃昏呢張相係響汀九橋嗰度影，試下記住以下呢段說話：「日已西沉，浮雲變色，轉眼夜晚經以來臨。」
然後合埋雙眼在腦海裏面諗幾轉，你會見到啲乜嘢？



DIY信號線接響DAC同擴音機之間，魔改擴音機在推喇叭之後再用咪收錄。




最後修改時間: 2025-05-02 00:11:45

日已西沉，浮雲變色，轉眼夜晚經以來臨。





最後修改時間: 2025-04-22 18:05:44

早一輪有個師兄過嚟家訪，並帶咗一啲歌曲嘅wav file兼職特登要點唱呢一隻歌，我聽過之後都覺得幾有試機嘅效果咁不如大家聽聽。



DIY信號線接響DAC同擴音機之間，魔改擴音機在推喇叭之後再用咪收錄。





最後修改時間: 2025-04-19 00:12:40

聽咗唔同嘅音樂就發過低音個動態似乎有所收斂，咁就再重新張把刀位置再調整，稍為向裏面再推入約莫一吋低音效果變返正常。



DIY信號線接響DAC同擴音機之間，魔改擴音機在推喇叭之後再用咪收錄。





最後修改時間: 2025-04-17 00:17:04

好耐之前喺淘寶買咗部收音機畀老婆喺廚房聽電台，不過呢部收音機係内置天線所以接收得唔係太好，如果天氣差直情噪音仲大過收到嘅訊號。近期摷嘢摷到部擺埋好幾年嘅華為手機，即管叉叉電睇下部機仲得唔得，奇蹟地部機仲叉到電兼且可以正常運作。正諗緊部機仲有乜嘢作用突然靈機一觸不如攞去做網絡電台，將佢嘅輸出插返去收音機嘅line in，咁又唔會浪費咗部機亦都解決咗噪音呢個問題。一不做二不休集齊所有線材同埋叉電牛就即刻搞掂佢，將部普通收音機變成咗網絡電台，慳咗錢又為環保出咗一分力又解決咗個問題，真係very good啦。







最後修改時間: 2025-04-12 20:33:43

都係嗰句冇比較就冇傷害，即係等於你成出去食飯都係幫襯大xx快餐當然你唔覺得有咩嘢特別問題，但係當你偶然幫襯一啲高檔啲嘅食肆食返相同嘅燒臘飯或者炒飯，你就發覺之前大xx嗰啲點解佢啲燒鴨係梅嘅，啲叉燒咁乾嘅，碟炒飯點解啲飯咁淋冇咬口嘅...。如果你有能力咁咪從此唔去大xx嗰度食囉，最怕你條件所限每日都要去返嗰度食晏，但係又諗返起好好食嗰間餐廳你話痛唔痛苦。

事源上個禮拜前輩k.c.78駕臨寒舍聽我套粗嘢，一開聲就擰曬頭話好唔掂，當然我就好奇怪聽開都幾好聲呀唔係咁差呀，前輩真係忍唔住攞咗一對寶貝出嚟(鉛刀)放響我部擴音機下面，神奇嘅事情就發生咗，成個畫面豐富曬之前嘅空洞位消失咗人聲潤澤咗。咁嘅神器顯露咗佢嘅威力之後佢想離開我門口都幾難，好彩前輩都係預咗留低對嘢，否則就好似我上面講嗰個去大xx食飯嘅主人翁咁每次聽歌都會有痛苦嘅回憶。之後呢幾日反覆嘗試發覺都係擺響DAC下面啲聲最啱我口味，咁我錄咗兩隻歌一隻係未加呢把鉛刀一隻係加咗，我就發覺音效有好明顯嘅改善，唔知你又聽唔聽得出。





DIY信號線接響DAC同擴音機之間，魔改擴音機在推喇叭之後再用咪收錄。



(有鉛刀）





最後修改時間: 2025-04-09 00:23:36

今日執執下嘢畀我發現咗幾十年前買落攞嚟噴CD嘅補品噴液，噴咗響CD面然後用贈送嗰塊布搽勻會靚聲啲，仲記得當時應該好似賣HK250蚊一支，聲稱可以噴100隻CD。







最後修改時間: 2025-04-05 22:19:01

其實考古學家已經變相證明咗地球係經歷咗幾個文明，不過最終都係毀滅。當然毀滅嘅原因都有幾種，但係最主要都係當人類嘅文明去到某個程度嘅時候，因為有啲個別國家妄想去控制地球上所有其他國家，最終大殺傷力武器可能會被使用，人類累積咗過萬年嘅文明從此重新回到單位數字。

中國有句說話：「花無百日紅」，香港之前最興就係拍啲黑幫電影，當一個黑幫大佬年老色衰嘅時候其實佢就應該交出權力，如果佢仲盞暖權力只會濫殺無辜將所有有威脅甚至只係潛在威脅嘅人或者群體都全部殲滅。為咗達到目可以不擇手段，最終當然天下大亂。我哋呢啲升斗市民響呢啲風起雲湧嘅環境裏面其實乜都做唔到，只可以自求多福。就算嚟緊環境有幾惡劣而面對嘅處境有幾絕望都好，心裏面嘅理念一定要抱有希望，期望明天會更好才可以活下去。



DIY信號線接響DAC同擴音機之間，魔改擴音機在推喇叭之後再用咪收錄。





最後修改時間: 2025-04-05 00:55:50

其實呢個世界好奇怪，玩得多路分音嘅師兄信號源都係用LP（類比訊號）比較多，通常越係LP嘅資深發燒友越系討厭數碼訊號嘅聲音。不過呢個世界就係咁奇怪，如果要玩多路分音最準確應該係用電子分音器。但係電子分音器裏面就係先用AD將類比訊號變成數碼訊號，用DSP分頻之後再將每個頻道經過DA轉換同埋數碼濾波變成類比訊號才去前級或後級。

呢個分頻器嘅DA轉換電路比起其他外置嘅獨立解碼電路絕對會係差好多，如果玩多路分音嘅師兄覺得個聲可以玩得非常好嘅話，咁樣佢應該對數碼訊號同埋轉換器不抗拒先至啱，因為佢個系統裏面心臟地帶正正就係作咗多次數類比同碼轉換。



最後修改時間: 2025-04-02 14:57:55

瘋言瘋論篇（電子管燈絲供電）：

不過講開電子管燈絲供電呢個問題，其實有好多師兄嘅情意結都係偏向用交流供電，因為聲音係比較好啲（活啲）。

我細思呢個問題就覺得其實交流供電某程度上等於對音樂信號加咗一個60hz嘅調制訊號，即係話如果有一個1khz嘅信號就會成生多兩個差頻信號（1K +/- 60)，某程度上增加咗聲音嘅厚度，會唔會呢個就係佢比較好聲嘅原因。

但係電源噪音確係比較煩，所以有啲師兄為咗減低電源噪音嘅影響亦都唔想犧牲咗呢個獨特嘅音染，佢哋就會響燈絲加恆流源。冇訊號嗰陣時恆流動源等同直流穩壓，但當有訊號變化嘅時候，燈絲負載變化而導致恆流源電壓產生變化，即係燈絲兩端電壓隨著音樂信號亦都產生變化（當然低頻嘅影響會比較大）。咁樣亦都會產生一定嘅調制訊號，從而令到聲音變厚。

不過以上都係想當然嘅結論，唔知有冇師兄有啲測試數據同聆聽感受可以提供作進一步參考。



最後修改時間: 2025-04-01 12:24:03

近期響國內嘅音樂節目見到呢位台灣歌手唱咗佢隻成名作，講真我都好耐冇聽過呢隻歌，當時覺得唱得非常好好動聽。所以即刻搵呢隻歌返出嚟，果然薑係越老越辣以前個聲線係比較幼嫩一啲。



DIY信號線接響DAC同擴音機之間，魔改擴音機在推喇叭之後再用咪收錄。





最後修改時間: 2025-03-31 23:00:01

今年樂壇就似乎真係冇乜好消息，壞消息就好似一個接一個。昨日又聽聞一個資深歌手離世，雖然佢唔係大紅大紫嘅歌手但係如果有返咁上下年紀應該都聽過佢呢一首成名金曲。



DIY信號線接響DAC同擴音機之間，魔改擴音機在推喇叭之後再用咪收錄。




最後修改時間: 2025-03-30 21:26:20

呢個紀念專輯終於去到最後一首歌，咁點解係呢首？
因為聽聞響昏迷咗四日之後就係因為聽咗呢隻歌而甦醒，究竟係巧合定係呢隻歌對佢嚟講有特殊意義就不得而知。



DIY信號線接響DAC同擴音機之間，魔改擴音機在推喇叭之後再用咪收錄。





最後修改時間: 2025-03-29 20:38:41

而家手機影相嘅質素真係越嚟越高，基本上唔需要買相機。好似我呢部4千唔到嘅小米14T pro，影出嚟嘅相影像非常立體，結像清晰。

Once more....



DIY信號線接響DAC同擴音機之間，魔改擴音機在推喇叭之後再用咪收錄。

Once more....



DIY信號線接響DAC同擴音機之間，魔改擴音機在推喇叭之後再用咪收錄。