- #17 [Daddy^k], 18-03-13 20:53條友的確有d over 左
- #16 [oeel], 18-03-13 20:53條友自己吾記得走膠先。
- #15 [Chia], 18-03-13 20:44唔用飲管有几環保,比人洗左腦咩
除左飲水同茶,記住用飲管.
否則会易蛀牙.
以前有纸飲管,好耐無見了
新科技有食得的飲管 -
- #14 [oeel], 18-03-13 20:38只要佢將支膠飲管用完洗返再偱環咁用,佢跟本吾洗買鋼飲管。
膠過幾百年都吾會爛,小心的用,又吾怕會壓偏添。重可以留比佢下下下一代都得啦。
不過,攞支鋼飲管出黎,的人一睇都知你係環保人仕。咁又真係型好多既。 til
最後修改時間: 2018-03-13 20:39:56 - #13 [dttmtong], 18-03-13 20:1812,
睇佢 FB,真係唔知佢平時邊忽環保 - #12 [chan@review33], 18-03-13 19:35由石器、金屬器到今日塑膠時代一用即棄,人類文明發展對地球生態黎講都係福街 x2
條友上 facebook 唔知要浪費左幾多電力
所涉及的電話,電腦,網絡唔知用左幾多不能分解的物質 - #11 [RickMax], 18-03-13 19:18我都想買對私伙和武器定野箸用下,驚太短食湯粉唔夠長
- #10 [S.Chan], 18-03-13 18:56值得支持但又不要太過矯枉過正, 自己係咪真係做到百分百.
- #9 [Daddy^k], 18-03-13 18:52#8 wakakakakaka !!!
- #8 [dttmtong], 18-03-13 18:49不過我真係好想加入走塑行列,不過係走 condom
- #7 [dttmtong], 18-03-13 18:46你咪唔好要枝飲管,無理由迫人將呢杯飲品俾其他客,然後俾杯無飲管過你。
- #6 [RickMax], 18-03-13 18:39侍仔一時無走膠都唔洗就扯火發脾四貼文
以環保為名自覺有優越主意抨擊他人,好有激進原教旨主義feel
由石器、金屬器到今日塑膠時代一用即棄,人類文明發展對地球生態黎講都係福街 - #5 [Daddy^k], 18-03-13 18:02
- #4 [Kelvinzy], 18-03-13 17:58執著的環保小先鋒
- #3 [tpe_ryan], 18-03-13 17:57佢可以堅持,佢亦都可以吾再幫襯
佢點解又吾去連鎖咖啡店抗議用不可再造紙杯??
同埋吾知位人士身上有幾多樣野著上身係不可再造
〉〉小事?唔係小事嚟㗎!你知唔知一支塑膠飲管跌咗落海(或埋喺土地下)係需要花上百年先化(自然降解),係可以好嚴重㗎!
環保能,人類對世界係癌症,應該一齊自殺架
最後修改時間: 2018-03-13 18:00:56 - #2 [BB1668], 18-03-13 17:56凍飲傷身呀!改飲熱飲喇!
- #1 [today2046], 18-03-13 17:50https://m.facebook.com/groups/1852448145005305/permalink/1978247115758740/
灣仔華星冰室昨日「走塑」中伏經過,原文已去信店方候覆個案會持續更新。
(2000幾字長文慎入…但絕對值得閱畢)
你好,
本人為網上Facebook群組「#搞走塑」其中一名成員,現有一些有關貴公司旗下餐飲服務在堂食安排和處理上想向閣下請教及提出一些建議,望能花一點時間閲畢以下內容。
事情嘅觸發點係於2018年3月11日早上7:00,當時位於灣仔嘅華星冰室分店尚未開門本人在門外等候,負責收銀嘅女士很好人叫我可以先入坐,夠鐘至點餐,到了點餐時間店員先同其他已入坐嘅客人先落Order,對本人嚟講也沒有所謂反正當時唔趕時間,期間店員能一次過落三四張檯嘅Order我也相信佢有把握通通記齊。
輪到本人點餐嘅時候,我說:「唔該一份老外早餐…走煙肉哎唔該(因本人目前係一位會食蛋奶素嘅素食人士)」店員繼續問我飲乜嘢,我話:「一杯凍檸茶唔該,麻煩幫我走飲管…唔駛俾飲管我我自己有(動作配合從餐具袋拎出一支粗身嘅不鏽鋼飲管)」店員亦清楚目睹同時又有回應走飲管,我見他手中不斷寫紙仔估佢有將我嘅「走塑」要求,和剛才走煙肉嘅要求Mark喺紙上將訊息傳達俾水吧嘅伙記知道…
豈料數分鐘後,同一店員呈上嚟嘅凍飲卻如常哋插住一支塑膠飲管,我未有接觸杯嘢同時叫住該店員第一句就問佢:「可唔可以將依杯俾咗其他客人先?因為我唔想浪費咗支飲…」話未說完店員才發現本人曾經有咁嘅要求我邊講佢就邊拎走杯凍檸茶,不消5秒佢就極速再呈上一杯無插塑膠飲管嘅凍檸茶,我醒覺到佢可能就咁抽開支塑膠飲管俾返剛才同一杯飲品我,我追問佢點樣處理剛才支飲管?真不敢相信不幸嘅事情竟然發生在我身上,佢竟然答我:「我掉咗~」店員可能要忙著其他事就轉頭回去沒有理會我嘅追問,與此同時另一位店員就呈上一份走煙肉嘅老外早餐。
見到美食當前都頓時無曬Mood真係食咩都無啦?按照慣例如本人經歷堂食未能成功「走塑」嘅情況,我哋係應該即時離場以示對店方嘅不友善行為表達強烈嘅不滿同抗議,但為免店員會再一次造成其他方面嘅浪費,本人只好懷著非常不滿嘅心情,用平日隨身嘅可重複使用多次嘅可摺疊式餐盒同杯,將所有食物打包然後埋單。
該店員見狀卻同我講:「唔好咁執著啦!一支飲管好小事啫⋯⋯」(當時佢食梗嘢)我喺水吧位以更嚴厲嘅語氣向佢哋解釋:「小事?唔係小事嚟㗎!你知唔知一支塑膠飲管跌咗落海(或埋喺土地下)係需要花上百年先化(自然降解),係可以好嚴重㗎!」我見佢只回應:「得喇得喇!」就繼續食嘢!最後我再請求佢哋作為前線飲食業人員係有依份責任負責把關,跟住為免影響店內其他食客(實際剛開門只得三檯客)我就惟有無奈地自行離去不再費氣力對牛彈琴了。
事情嘅經過看似只是一宗大部份人都不太著緊的「小事」,但為何坊間會出現我哋依類進餐時要求全面「走塑」嘅麻煩食客,全因為我哋知道今時今日隨便去一個海灘半小時內可以隨手執到幾百甚至幾千件塑膠垃圾,而一千件當中又好輕易地摷到超過200支不同大小嘅塑膠飲管,而你會發現每一支飲管嘅表面均曾被無數嘅海魚「進食」過,更不幸地海魚最後會由我哋人類嚟食返佢,亦即係話我今日浪費咗一支塑膠飲管,唔知點解佢會無故地飄洋過海積存喺偏遠嘅島嶼灘岸之上,最後剩底無人救嘅會繼續被海浪沙石沖刷變成更微細嘅膠粒,滲入地下或回到大海繼續被海洋生物誤以為係食物,加速死亡導致生態災難,未死嘅就俾我哋人類吸收進入食物鏈,無知嘅人一定會覺得依啲係「小事」~
以上就係「微塑膠」禍害嘅產生過程,我唔需要你哋店方去明白甚麼深奧嘅環境污染大道理或要增撥資源來配合應對,我哋只係希望店方可以如常地配合一個簡單嘅要求,素食者唔食肉你哋可以幫手「走肉」,健康原因唔飲得太甜可以幫手「少甜」甚至「走甜」,同樣情況唔想進食時消耗任何即棄塑膠餐具,店家可以同先前提及嘅落單模式需要幫忙食客「走塑」,一樣咁重要不可輕視嘅一個環節。
我唔知道前兩者如未能達到部份客人要求會否「出事」,但我可以向貴店保證,環保走塑人士唔係驚咗塑膠餐具有毒或者對膠恐懼症,我哋只係想將上面嘅嗰種「人棄膠,魚食膠,人又食返魚」依個惡性循環,由我哋自己身上終結,但如果要所有人全部唔出街食飯嚟逃避亦唔係辦法,反而就我哋所見目前卻有越嚟越多食肆鼓勵食客落單時容許「走飲管」不主動提供客人問到先俾,甚至電視廣告都有賣個細路女嗌:「走飲管哎唔該!」往往要由年輕嘅下一代嚟提醒返我哋工作狂幾繁忙都有責任「走塑」嘅重要性,事實上我哋依代人係做得過份咗以致世界上好多地方被破壞而不能逆轉,再好嘅嘢都留唔到俾我哋珍而重之嘅下一代,實在慚愧。
最後我只係想表明當Order清晰嘅指引立場店員都收到嘅話,唔該根據返同其他「走xx」嘅Order一視同仁,不能強迫客人夾硬接受既定嘅服務咁解,我相信依個要求絕對唔過份吧?而且我哋真係無需要店方增撥任何實體上嘅硬件資源來配合,相反如果有一百位客人有走飲管…甚至連外賣都唔需要店方提供額外餐具器皿,咁一年可以節省到嘅將會係一個可觀嘅數字,反觀政府明年開始實施垃圾按量徵費,依種情況你哋遲早都要面對,倒不如搶佔先機趁機學習和對旗下員工加多一點依方面嘅培訓,而家我唔係要求貴店去學某間小本經營嘅茶餐廳全店改用不鏽鋼飲管俾客人用咁大成本咁不近人情,我只係建議至起碼店員能做到與日常處理例外命令嘅處理方式之態度睇齊,相信如果你願意踏出善意嘅第一步來配合,業界亦會以你為榮同時爭相仿傚,成為「走塑Friendly」食肆變相對於企業形象也有所提升,實乃一家便宜兩家著之創新規劃啊!
在此還望貴公司能與時並進採納本人之建議,期望會得到店方在洞悉實況之後作出一個令大家都滿意嘅答覆,好讓本人把此分店從各大網上飲食及環保議題相關討論群組中可能出現之「走塑不友善黑名單」內盡快除名,一個月後嘅今天本人會嘗試再次光顧希望屆時已就上述情況作出改善,感激!
#華星冰室
#走飲管失敗
#不鏽鋼飲管
#16ozFoFoCup裝走凍檸茶
#伸縮矽膠盒裝走老外早餐 - 返回 ...